‘Pinte un bisonte na caverna, por favor’: novos formatos creativos no Centro ON Caixa Galicia

Hoxe, 9 de outubro de 2007, estou feliz de presentarvos o meu novo proxecto de comunicación entre literatura e artes dixitais: «Pinte un bisonte na caverna, por favor», no Centro On de Caixa Galicia da Coruña.

Había tempo quería artellar encontros híbridos que xunguisen a literatura, a fotografía ou a arte a novos formatos expresivos, nomeadamente os dixitais.

Logo de procurar un espazo que acollese esta iniciativa e de deseñar un programa variado en nomes e perspectivas, tanto de Galicia como de fóra, estréome dirixindo este ciclo que se desenvolverá entre o mes de novembro de 2007 e marzo de 2008. Traerá á caverna -esa sala de ponencias do Centro On que me semellou unha caverna a primeira vez que a vin, pequena e audiovisual- a unha serie de creadoras e creadores que están reinventando os nosos xeitos de pintar nas cavernas, de mirar, de ler, de participar.

Dezanove escritores e artistas, dez mulleres e nove homes, do sector audiovisual, do literario, da crítica, da fotografía e a arte. Redefinindo a arte de pintar, de comprender e de mirar a través de espazos como salas de arte, blogs ou plataformas de fotografía -fotolog e Flickr- e de vídeo.

Algúns virán en parella, confrontando xeitos de ver e modelos para armar.

Será os xoves de 19 a 20 h. durante finais do outono e todo o inverno até o despuntar da primavera. A entrada é de balde  [pero os relatores non veñen de balde, respectemos sempre o traballo, por favor!]. Presentareinos a todos e cada un como merecen.  Teño moitísimas ganas de os coñezades e viñades pintar bisontes canda nós!!

A Arte é un híbrido monstruoso e queremos contalo e velo!

Velaquí a nota de prensa que o Centro On de Caixa Galicia, que patrocina este ciclo, presentou:

«O Centro ON Caixa Galicia (Cantón Pequeno, 9-11. A Coruña) acollerá nos vindeiros meses o ciclo “Pinte un bisonte na caverna, por favor”, un proxecto que reunirá, ata o vindeiro mes de marzo, unha escolma de creadores galegos moi vencellados á web e ás súas ferramentas  de comunicación.

Pintores, escritores, fotógrafos ou videocreadores, todos coas novas tecnoloxías coma eixe común,  pasarán polo auditorio deste espazo coruñés para compartir co público o seu traballo, exhibido día tras día na rede a través de blogs, fotologs ou flickr, entre outras.

“Este novidoso proxecto intenta”, segundo a directora do ciclo, Estíbaliz Espinosa, “volver aos inicios artísticos do home, cando empregaba as paredes da súa caverna para expresarse artisticamente. O auditorio do Centro ON Caixa Galicia é a caverna e a pantalla xigante, a parede onde o artista plasmará a súa obra”.

Con esta iniciativa, Caixa Galicia quere apoiar a autores noveis e consagrados en distintas disciplinas artísticas para que poidan amosar os seus traballos fóra da rede.

Así, na aprogramación figuran dende críticos literarios coma Alfredo Ferreiro, ata fotógrafos coma Rebeca Saray ou Javier Quintana, creadores audiovisuais como Sara Jess, Iván López Gimeno ou Marina Núñez, ou autores multidisciplinares como María Lado ou Igor Lugrís.

Web e tecido cultural

Nos últimos anos internet transformou radicalmente as relacións entre o autor e a súa obra, e máis entre o produto cultural, o seu público e a industria, unha mutación absolutamente radical que define a escolma feita para este proxecto.

 “Os blogs están a crear de forma decisiva un soporte de intercambio e información entre o tecido cultural que supera as barreiras da visibilidade nos medios tradicionais, e instalan novas rutinas prácticas entre os  sectores da produción cultural que provocan que, na actualidade, poucos proxectos culturais novos non empreguen a internet nunha, en varias ou en todas as súas etapas de creación, distribución e retroalimentación”.

O Consello da Cultura Galega, no seu informe “A comunicación en Galicia 2007”, xa sinalaba a importancia destas ferramentas da web nos procesos de creación do noso tempo, unha influencia crecente que queda retratada nesta mostra, “a primeira deste tipo que se fai en Galicia”, segundo a organizadora.

PROGRAMACIÓN

22 NOV                Iván López Gimeno         Fotografía           http://www.ivanlopezgimeno.com/

29 NOV                Olga Osorio                        Fotografía           http://olgaosorio.wordpress.com/

13 DEC                   Maria Lado                         Blog                       http://casatlantica.blogspot.com/

20 DEC                   Elba Fernández                 Fotografía           http://www.flickr.com/photos/pequenasuricata/

                                 Rebeca Saray                    Fotografía           http://www.fotolog.com/dosismortal

10 XAN                        Pablo Gallo.                       Ilustración           http://es.geocities.com/pintorgallo/

17 XAN                         Branda                                 Plástica                               http://brandapinta.com/principal.htm

24 XAN                        Sara Jess                                             Vídeocración    http://ocartafoldesilencios.blogspot.com/

31 XAN               Adrián Figueroa                                Ilustración           http://www.fotolog.com/onionboy

                                 Noemí Cubillo                    Fotografía           http://noemicubillo.com/


07 FEB                  Estibaliz Espinosa                              Blog                       https://estibalizes.wordpress.com/

14 FEB                      Alfredo Ferreiro                 Blog                       http://olevantadordeminas.blogaliza.org/

21 FEB                         Igor Lugris                           Blog                       http://www.agal-gz.org/blogues/index.php/ovnis

28 FEB                 Samuel Fernández                           Animación          http://www.acola.net   

06 MAR                 Sandra García Rey                 Fotografía           www. flickr.com/photos/pequesquimal

13 MAR                    Iván Marcos                       Vídeocreación http://www.aadteg.org/ficha.php?ids=165

20 MAR                 Javier Quintana                               Fotografía           http://www.fotolog.com/kevincarter

                                 Pablo Honey                      Vídeocreación http://www.fotolog.com/notdesign

27 MAR                 Mariña Núñez                    Audiovisual        http://www.ma.uva.es/~antonio/MarinaNunez


Auditorio Centro ON Caixa Galicia. Cantón Pequeno, 9-11. A Coruña.

Horario: de 19.00 a 20.00 horas

Entrada libre e gratuíta.»

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s