Este ano 2015 esta web cumpríu 10 anos.
Grazas a todos e a todas as que lestes, curioseastes, comentastes, doastes, trolleastes e mmmm por ela ao longo desta década. Case 130.000 visitas e máis de 10.000 lectoras e lectores [iso di wordpress, igual unha plataforma optimista]. Grazas a todxs xs que confiades tamén na pantalla como complemento ao papel, sen desprezar nin a un nin a outra. Grazas a todas as que considerades a curiosidade literaria unha irmá siamesa da curiosidade científica. A literatura ábrese paso como pode, onde pode. Asómase aos abismos. A literatura é arriscar, abismarse, non dar puntada nin sintaxe sen fío, pero ás veces tamén é perder pé e caer de cranio, de fociños ou de cu.
Non vexo mellor maneira de celebralo que saíndonos de órbita co álbum ilustrado que a laboriosa colmea da Editorial Apiario publicou en papel – e que papel!- hai uns días: Caer de cu polo universo, cos fabulosos debuxos de Lucía Cobo, e até postais, selos e pegatinas para darlle ao collage cósmico.
Así mesmo, proximamente publicarei a versión definitiva de curiosidade, ese libro algo híbrido que se me fai de rogar. Tamén publicarei o vello -orama, do 2001, en pdf, para descarga libre.
Eureka.
...Estíbaliz Espinosa... palabra ciencia canto 
felicidades por esos 10 anos. Que sexan moitos máis !!
Moitas grazas!!